کندهار کې د ۲۴ میلیونه افغانیو په لګښت د څلورو تاریخي آبدو د ترمیم چارې پيل شوې
د ميرويس خان نيکه او احمدشاه بابا د زيارتونو د ګنبدو ترڅنګ د احمد شاه بابا د کور او په سپين بولدک ولسوالۍ کې د احمدشاهي حوض د رغوني چارې پیل شوې.
د اطلاعات او فرهنګ سرپرست وزیر ملا خیرالله خیرخوا وايي چي پر دغه څلورو ابدو شاوخوا ۲۴ میلیونه افغانۍ لګښت راځي چې ۲۲ میلیونه د وزارت او پاتې نورې د موسسو له لوري ورکول کېږي.
«زموږ هڅه دا ده چې د دا ډول تاریخي ابداتو ساتنه او پالنه وشي.»
د اطلاعاتو او فرهنګ وزارت مسوولين وايي چې د کندهار تر څنګ په غزني، هرات او ځینو نورو ولایتونو کې هم د تاریخي ابداتو د ترمیم چارې روانې دي. د دوی په خبره، له دې کار سره به هېواد ته د بهرنیو سیلانیانو راتګ لا زیات شي، چې ګټه یې بېرته افغانستان ته رسیږي.
د کندهار د اطلاعات او فرهنګ رییس مولوي انعام الله سمنګاني وايي چي د داخلي سېلانیانو ترڅنګ د اسلامي امارت له راتګ سره کندهار ته د بهرنیو سېلانیانو راتګ خورا ډېر چې د دغو ځایونو په رغوولو سره به نور هم ډېر شي.
«تمه شته چې دا کارونه په سم ډ،ل سرته ورسیږي او په راتلونکي کې هم د دغسې ځایونو رغېدل زیات شي.»
بل خوا د کندهار د سوداګرۍ او پانګونې خونې رییس محمد صدیق مهمند بیا د سوداګرو په استازیتوب د هر ډول همکاریو ډاډ ورکړ.
نوموړي دغه راز غوښتنه وکړه چې د احمدشاه بابا د کور شاوخوا دې چمن کړل شي.
«زه له وزارت څخه یوه غوښتنه لرم چې د احمدشاه بابا د کور شاوخوا پارک جوړ کړي او دغه راز د سیلانیانو لپاره باید دلته یو هوټل هم جوړ شي»
د یادونې وړ ده چې په کندهار کې په تېرو کلونو کې د تاریخي ابداتو د ترمیم چارې څو ځله پيل شوي خو نیمګړي پاتې شوې.
URL تعقيب: https://www.ansarpress.com/pashto/27524
